ka ngam nawh

Lengdang tawnah i vul lai hin e;

Ka thlir ngam nawh i nui hmel.

Ka ta dingin par naw la khawm,

I mawina a chuoi chuong nawh.

Kan hlan ngam naw che nang ngaina ;

Ka ta dingin i vul ve si nawh.

Kan hmai nawh i dawn lungruok,

Mi tawnah i luongliem si.

Phalo te'n ka thlir che;

Hmangai lo ang el hin.

Sienkhawm,laimu nêm mei ang a kâng,

A rik, i zûn phur hih.

Duaisam hi maw ka chan lo nih;

Ni sien tia dâwn el khawm,

Laimu a dam ngang naw nih;

Lungrun mi vei ve hram rawh.

Mawi takin inzam nawk a tih țhal romei;

Lal inpak hlasak kan lawm hlimlai kha,

Hripui leiin maw a chuoi Biekna rûn,

Biekna rûn a re umkhuo a sawt.

Ei tawng hringnau rûm khâwk ri;

Ditlai țhena di'n a na taluo ie,

Dawm lo chawi loa an fam ding chu;

Kan ko che Lalpa hringnau ha'n.

Biekna rûn lamtluong hraw ni her suok sien;

Châwnbân vawra inpak hla sak ni,

Khuong ri mawi benin lamtuol zawl hluo in,

Duthu ai ang kan sam.

Tuorselna'n min thuom la Lalpa;

I remruotna nghak beiseina hring hih,

Chuoi loin i ram min ngai zuoltir la;

Hring nauhai hih i tieng min lawipui rawh.